اسألة متكررة بنتسألها عن المنيماليزم

س : ليه تبقى منيماليست ؟

ببساطة لأنها طريقة ممتازة للهروب من تجاوزات العالم حوالينا - تجاوزات النزعة الاستهلاكية ، والممتلكات المادية ، والفوضى ، و فكرة الكثير مما يجب القيام به ، والكثير من الديون ، والكثير من الملهيات ، والكثير من الضوضاء.

المنيماليزم هو وسيلة لتجنب الحجات غير الأساسية للتركيز على المهم فعلا ، و اللى بيدى لحياتنا معنى، و بيحسسنا بالفرح والقيمة.

س : مش بتحسى ان المنيماليزم ممل بسبب عدم وجود أى حاجة فى حياتك ؟

ده المفهوم الغلط عن المنيماليزم .. هو مش بالضرورة معناه الرهبنة أو الملل أو الفراغ ولا هو ممل و عقيم بالعكس !!

فى الحقيقة هو ممكن يكون كل اللى فات ده لو انت قررت تمشى فى الاتجاه ده لكن أنا مشجعش حد يعمل كده !

الاتجاه اللى بأتبعه و بأدافع عنه و بأتكلم عنه باستمرار هو انك تتخلص من الحجات اللى بتشغلك عن الحجات المهمة ... بتتخلص من حجات لا تثير جواك أى شعور بالفرح عشان تستمتع بالحجات اللى بتثير الشعور ده و البهجة و حجات تانية حلوة كتير ...

بتتخلص من الحجات اللى بتلهيك عشان تركز على الحجات الأساسية فتنجز بشكل ممتاز ... و هكذا

نفضى الجدول بتاعنا عشان نعرف نقضى وقت مع حبايبنا ....

التركيز على السلام الداخلى و على الروحانيات و على التفكير ... و بكده هنوصل لمزيج جميل من مشاعر الفرح و البهجة و الاستمتاع و تحقيق الانجازات الكبيرة.

س : ايه هو اسلوب المعيشة بالمنيماليزم ؟

هو ببساطة التخلص من الأشياء اللى لا بتستخدمها ولا بتحتاجها فتكون فى بيئة صحية بسيطة مفيهاش حجات مكركبة.

انك تعيش بدون هاجس الحجات المادية أو هواجس من نوع انك لازم تعمل حجات كتير و تلاقى نفسك فعلا بتعمل حجات كتير جدا !

يكون عندك أدوات بسيطة تخزنها فى دولاب بسيط و تحمل القليل و تعيش بخفة.

س : ايه هى فوائد المنيماليزم ؟

بيفيدنا المنيماليزم فى حجات كتير ... اجهاد أقل, تكاليف و ديون أقل, تنضيف و صيانة أقل, متعة أكتر, مجال أكتر للناس اللى بنحبهم, احساس بالسلام الداخلى, فرص لعمل الحجات اللى بتفرحك... استدامة أكتر و تنظيم أسهل .. و دى البداية بس مش أكتر!

س : ايه القواعد اللى مفروض أتبعها عشان أكون منيماليست ؟

مفيش قواعد و مفيش طريقة واحدة للموضوع ده !

اللى هأقترحه انا عشان تعيش منيماليست غير اللى هيقترحه حد تانى!

فى حجات عامة بنتبعها مش أكتر و هى انك تعيش ببساطة بدون ممتلكات كتيرة غير ضرورية و ملهيات و كراكيب و حجات تالفة و تعيش بدون ديون بشكل دائم و كنتيجة طبيعية جدا لأسلوب حياتك.

س : ازاى هأعيش منيماليست فى المدينة ! الموضوع ده يمشى فى الأرياف ماشى أو فى مكان كله طبيعة و خضرة.

هو الموضوع ده قررت أكتب فيه مخصوص علشان حياة المدينة!

فى وسط زحمة الجدول و الشغل و المسافات الكبيرة اللى بنقضيها فى العربية مبيكونش فى مجال اننا نشتغل جوا و بره البيت كمان ! و بيكون الموضوع مهلك جدا نفسيا و جسديا !! فالمسمى اننا بنشتغل عشان خاطر أولادنا اللى فى الحقيقة احنا مبنقعدش معاهم عدد ساعات كافية عشان نفرحهم و نربيهم و نعتنى بيهم !! بردوا مبيكونش عندنا طاقة و احنا معاهم فكل حاجة بيعملوها بتكون بالنسبالنا ارهاق و تعب زيادة ! و نفضل نزود على الجدول بتاعنا حجات أكتر و أكتر من نوع تمرينات و كورسات و ما الى ذلك عشان ننمى مهاراتهم .... كل ده جميل لكن كل ده فى جدول يومى يبقى كتير جدا جدا و غير آدمى!!

مهما كنا بنريح ضميرنا الا ان لا جسمنا مرتاح و لا صح نعمل ده.

بدايتى مع المنيماليزم حصلت لما اتنقلت من الشرقية للقاهرة ... الحقيقة و انا فى الشرقية اتربيت على ان كل حاجة عايزاها بعرف أجيبها و بأجيبها بسهولة و مهما طلعت من حجاتى فبردوا عندى حجات أكتر ... لما أخدت كل الحجات دى معايا القاهرة لقيت نفسى مرهقة جدا فى صيانة و تنظيم و ترتيب الحجات دى بدل ما أكون بأعمل تجارب و بأخرج و أنجز و أستغل الفرص المتاحة!

فقررت أتخلص منها.

س : ازاى أقنع زوجى أو شريكى باننا هنكون أكتر سعادة بحجات أقل ؟

ميتقدرش تغير الناس و لو عملت كدة هيتضايقوا منك و يبدأوا يتخيلوا ان حبك ليهم قل !

بدل ما تركز على اقناعهم و تحويلهم .. ركز على حجاتك انت و كون مثال يحتذى به عن العيش ببساطة و اظهر فوائدها

لو عايز الناس تعرف انها هتكون مبسوطة بحجات أقل ... اعمل انت ده و اظهر النتائج و الفوائد بتاعته ... و اديهم وقتهم.

ده كان فصل من كتاب "المنيماليزم الجمالي" لمعرفة المزيد عن الكتاب اضغط هنا.